Bollen: ‘Si no duna union civil tur derecho awo, no por spera cambio den 10 aña’

Mi a skirbi e articulo aki pa e Bon Dia Aruba. El a aparece riba e matutino riba 21 di december 2020

Despues cu mi a saca afo e echo cu no lo bay otorga tur derecho cu ta duna matrimonio na parehanan di mesun sexo por medio di implementacion di union civil, mi a entrevista un di e huristanan cu a traha riba e propuesta original pa cambia codigo civil, Carlos Bollen.^[1] E docente hefe di derecho priva na Universidad di Aruba a remarca cu si mester implementa e derechonan adicional na otro momento, experiencia na Aruba ta mustra cu esey no lo ta te aki 10 aña.

E docente di derecho priva a contribui na duna comentario riba e propuesta original di 2009 den un comision, cual no tabata inclui e implementacion di union civil, mirando cu esaki no a bin te cu a introduci e amienda den 2016. Bon Dia a pidi Bollen su opinion riba Hof su conseho, cual ta encera cu ta haci un distincion entre derechonan esencial y derechonan supletorio, manera Bon Dia a publica siman pasa. Den esey, Hof ta menciona cu si na cierto momento un pareha sufri pa cierto falta di derecho, por yega na hues pa remedia e situacion. “E ta keda permanece, den mi opinion, como un tipo di discriminacion.”

Page 2 of 3. Memorie van Toelichting OLV 915 - Aanpassingsverordening Nieuw BWA

Contributed to DocumentCloud by Luis Anibal Villegas (anibal (Individual)) • View document or read text

‘Conseho di un banda laga na mita, di otro banda miedo cu union civil ta mucho controversial’

“Mi ta haya e conseho di un banda, (te con leu gobierno ta splic’e) si mi ta honesto, un tiki laga na mita. E conseho ta bisa cu por laga implementa e derechonan esencial awo, y esunnan adicional despues. Pero e experiencia na Aruba ta mustra cu si algo wordo regla, e siguiente 10 pa 20 aña nada adicional ta bin of nada ta wordo cambia. Mi speransa ta cu e situacion lo ta diferente cu e tipo di topico aki, pero tin un chens grandi cu niun hende ta bay tin durf pa kima nan dede y cambia esaki. Entre otro pasobra si wak di banda di politica, e cuestion ainda ta sensibel pa nan. Di e manera aki e situacion lo keda te aki.”

Di otro banda, Bollen por compronde tambe dicon e conseho ta manera cu e ta. “Dos of tres aña pasa e presidente di Hof durante instalacion di huesnan nobo a urgi pa e cambionan den codigo civil wordo implementa mas pronto cu ta posibel. Mirando cu e ta inclui un par di cambionan importante, (herencia, contract di huur, contract laboral, contratista, y mas) y cu Aruba ta hopi atrasa den esakinan, mi ta pensa cu Hof lo por tin miedo cu union civil ta mucho controversial y cu pa via di esaki henter e lista di cambionan no lo wordo implementa.”

Na mes momento Bollen ta kere cu “ta posibel cu Hof ta pensa cu si kita union civil den su totalidad for di e lista di cambionan cu ta di introduci cu e ordenansa di implementacion (invoeringsverordening), e implementacion di union civil den su totalidad lo por wordo poni den un lachi pa mas largo ainda cu e cambionan den codigo civil den nan totalidad a sinta caba. Pues mi ta kere consideracionnan practico lo a hunga un rol pa Hof.”

Trayectorio ta mustra cu cambio ta tarda hopi

Bollen ta yega na su pensamento tocante e tardansa di traha ley mirando dos aspecto: E echo cu no tin hopi hurista legislativo trahando na DWJZ, pero tambe e echo cu e ta algo hopi sensibel pa politica ainda. “No tin centenares di hurista legislativo pa Aruba manera cu tin na Hulanda”, Bollen a comenta.

“E cambio di e codigo civil a wordo cuminsa den 2009 tempo cu a hib'e dilanti minister di husticia. Te 2014 a entreg'e na parlamento, pa despues wordo trata den parlamento te 2016, y e tempo ey el a wordo aproba, pero desde e tempo ey el a bira keto. Esaki no ta e unico proyecto di ley cu ta experiencia e tipo di tardansanan aki. Tin hopi legislacion cu ta bieu y di un banda tin capacidad limita, pero sigur di otro banda ora ta trata di legislacion controversial, parlamento no kier tin mucho di ber cu nan.”

Bollen ta calcula cu si esaki wordo implementa y no haci e trabou bon y completo di biaha, e ora ey no por spera cu den e proximo 10 aña lo bin cambio den dje. “Mi ta spera cu mi no tin rason, pero asina e historia a mustra cu cosnan ta bay na Aruba.”

‘Homosexualidad ta practicamente acepta na Aruba, pero politica tin miedo pa controversia’

Ya tempo cu a bin cu e amienda cu a introduci union civil a bin protesta (mas tanto) di banda di religion Catolico, y aworaki cu e implementacion di e cambionan aki ta biniendo, por a mira articulonan di parti di Iglesianan Catolico di Aruba. Pero na mes momento varios pais den region a legalisa matrimonio pa parehanan di mesun sexo.

Bollen: “Derecho humano y sigur e tipo di derecho humano aki ta algo cu ta desaroya asina tempo ta pasa. Hasta paisnan Catolico cu antes tabata hopi contra e derechonan aki, riba hopi punto a sa di conoce un cambio di opinion. Un decision di Corte Europeo di Derecho Humano claro tambe lo desaroya segun tempo ta pasa, si 40 aña pasa a e corte a bisa algo, awendia loke corte a bisa e tempo ey ta sinta di otro manera.”

Na Aruba tambe tin un desaroyo, ora wak cu kier bay den direccion di union civil. “Esey ta un desaroyo positivo, y den mi opinion nan por bay hopi mas leu, pero pa un cantidad di hende esaki caba ta mucho leu. Mi ta kere esaki ta un cuestion politico.”

Si wak e desaroyo di e tema di homosexualidad na Aruba, Bollen ta bisa cu e por nota cu e no ta un problema mas, di e manera con ta experiencia sociedad su reaccion. Bollen: “Den sociedad mi no ta wak cu e ta un problema mas. E ta mustra cu casi tur hende ta acept'e, ta djis un cuestion cu bo no por papia mucho duro di dje. Pero politcamente evidentemente e cuestion ainda ta hopi sensibel, pasobra evidentemente tin miedo cu e lo por costa voto. Mi mes no ta wak riba kico e ta basa. Claro, ami ta bin di Hulanda pues mi ta consciente di esey, pero mi conoce hopi hende Rubiano, personanan gay of lesbiana, y mi ta nota cu e no ta un problema. P'esey mi ta kere e ta un problema politico. Di mi banda e no ta mustra cu e ta basa riba echonan.”

“Claro, tambe e desaroyo den paisnan rond di nos ta determina con nos ta mir'e. Den tur pais tin personanan cu tin problema cu homosexualidad, pa cualkier rason. Di otro banda tin hende cu no tin niun problema cu hende cu ta asina, y tin hopi hende entre e dos extremonan aki. Esey ta algo universal. Pero na momento cu un pais vincula su mes na derechonan humano y tratadonan manera e tratado di derechonan humano Europeo (EVRM), tin cierto obligacionnan cu esey ta trece cune.”